الحكمة في الكلمة // بقلم المبدع// سامر برقيو

 ....... الحكمة في الكلمة....... 

لا جهد يدوم من غير جهد الله..

   يالي قال: تقسم ظهري بالحمل..

     يحميك  العالي من وجع ال آه..

        إلا تظن  تقهرت وحدك بالثقل..

          شوف لي بايت برا السما غطاه..

            و الحصاد تحت الحر بالمنجل..

             خوذها  يا سيدي منين خفافت..

              راه باذنجان كيتكال غير بالمهل..

                 الصعيبة عليك بالحكمة سهالت ..

                      لا يغرك بصداه صوت الطبل..

                        لي تقدر توصلها ليك قدارت..

                      البعيدة ماتلزمك خليها بالعقل..

                    الذبان بعرامو على الزبل يتهافت.. 

                  النحل ما يقبل يعطي غير العسل.

                بنادم الحر ما يضروه شمايت.. 

              و الشوك مايوقف صياد الحجل.. 

           الدنيا دايزة فين صاروا ماليها..

        ناس بكري  بالعقل يلقاو الحل.. 

      يتفرق الجهد بقياس بين رجالها.. 

   ياك الخير من الكلام  ما قل و دل ..

      بنادم دالع خذاتو الدنيا وتغر بيها..

        ظن راسو دايم  للقبر ما يوصل

         راه الظبية تيق غير في سيقانها.

          والسبع بصوتو  ما تحسبو شبل..

            الصحة غالية ما تقدر تشريها..

             والقلب الصافي للعطا ما يبخل..

               المغرور ما يعرف فين ينهيها.. 

                الخير إلى قنعت يكفيك سطل..

                  الفرحة الا جات ما تقدر تخبيها..

                      و الحزن المكبوت دوامو يقتل..

                       ......... سامر برقيو..........