جيتك يا الخابية قاصداك// زجلية بقلم المبدعة // زينب ياسين
جيتك يا الخابية قاصداك وعليك نشكي.
يا مولات لميهة الصافية النقية لي تشفي.
علاش ساكتة وسادة عين وبوحدة كتشوفي.
كيسانك سمحو فيك وشربو ماء الغاشي.
وصلو شحفانين ونساو بالزربة عطشهم وكلشي.
سولت الخابية وتسنيت جوابها كتر من ساعات.
طليت عليها لقيتها نشفات ووكحات.
گالت لية عذريني راه اليدين علية كترات.
وشربو كلشي وريحة قطراني مشات مابقات.
عروق البراني من صفايا دات وخدات وشربات.
وكيسان ترابي لي لية بعطشها تسنات حتى شحفات.
وماحطاتني سطل بلا تقرقيب حتى من الوقفة عيات.
بعدما كانت على ريحتي تموت وفوجه الجفاف وقفات.
ومن كل جهة جات كيف الشتا بخيرها لصبات.
باش تشرب من ميهْتي النقية على كلمة وحدة تافقات.
تراب الخابية ديالنا واخة تنشف ويبقاو غير قطرات.
مانكرش كيساني كيحبوني وعاشو معايا حكايات.
لكن مني شراوني لكروش الجيعانة والدنيا تخلطات.
وباعوني لمن وَلَى وبتخلويضهم ميهْتي توسخات.
وكرهو فية كيساني وهجرتني وعلية حقدات.
باعت الغالي ومافكراتش فروحها وبيها ضحات.
ختارت الموت وفطريق الظلام والعافية مشات.
الهضرة كثيرة وكتجرح اللهم السكات.😔🥺
بلما تسناي تشوفي دموعي شحال هذا سالات.
يا الخابية الغالية العزيزة لا تهزي هم لا تبالي.
كيسانك عند البراني تبني وتحقق وتعَلي.
قدما نساتك وتغربت يجي يوم وتوَلي.
خيرك سابق تسناي رجوعهم عنداك تْمَلي.
#زينوشة🖤🖤
تعليقات
إرسال تعليق