ربط السلوكية// زجلية بقلم المبدع// جواد الزروقي
🌺ربط السلوگية 🌺
راه عارفك كتكذب
وطالق عليا السلوگية
كل مرة مسلسل
كل مرة قضية
ونا گالس نسمع
وطالق وادنيا
ونشوف بعينيا
جهدي راه قليل
وحتى حاجة ماهي بيديا
راه السلوگية
تجري وتشد الرنب ( الأرنب)
ونتى جالس عليا تكدب
ربط داك السلوگية
وتصالح مع ذاتك شوية
نسى داك الكدوب
وعيش حياتك الطبيعية
شحال من كذبة لوانتيها
ولبستيها تكشيطة حمراء
بلسانك رجعتيها امرأة
جميلة جايا من داك المدينة
حنا عارفين الحقيقة
وفقدنا فكلامك التقة
نتى ما بغيتيش تسكت
ولا تربط السلوگية
كل مرة قصة جديدة
فيها رواية وألف حكاية
نطلبو ليك غير الهداية
تنقس من الكدوب شوية
وتربط داك السلوگية
توضيح : شرح بعض المصطلحات للأنها مكتوبة بالعامية المغربية حتى يتسنى لكل القراء فهم معنى هده المصطلحات شكرا
السلوگية : تعني بالعربية السلوقية و هو حيوان يستعمل في الصيد الأرانب
ربط السلوگية : تعني كفى او توقف عن الكذب
🌹الزروقي جواد 🌹
🌹المغرب 🌹
تعليقات
إرسال تعليق